ដោយៈសិរីមតី
ភ្នំពេញ៖ កម្ពុជានិងជប៉ុន បានសហការគ្នាជំរុញការអភិវឌ្ឍធនធានមនុស្សផ្នែកបច្ចេកវិទ្យាទូរគមនាគមន៍ និងឌីជីថលនៅកម្ពុជា តាមរយៈការធ្វើសិក្ខាសាលារួមគ្នាដែលចែករំលែកបទពិសោធន៍ ចំណេះដឹង ពីវាគ្មិនជប៉ុន និង កម្ពុជាផ្តោតទៅលើសក្តានុពលនៃ បច្ចេកវិទ្យា ការការពារពីការគំរាមកំហែងតាមប្រព័ន្ធសាយប៊័រ សន្តិសុខតាមប្រព័ន្ធអ៊ីនធឺណិតនិងការអភិវឌ្ឍវិស័យទូរគមនាគមន៍។

សិក្ខាសាលាស្ដីពី Emerging Digital Technology powered by JAPAN—Current State of Open RAN and Cybersecurity សហការរៀបចំដោយក្រសួងកិច្ចការផ្ទៃក្នុងនិងទំនាក់ទំនងនៃប្រទេសជប៉ុន ,ក្រសួងប្រៃសណីយ៍និងទូរគមនាគមន៍ បណ្ឌិត្យសភាបច្ចេកវិទ្យាឌីជីថលកម្ពុជា (CADT) និងក្រុមហ៊ុនOREX SAI, INC។

សិក្ខាសាលានៅបណ្ឌិត្យសភាបច្ចេកវិទ្យាឌីជីថលកម្ពុជា (CADT) នាថ្ងៃទី២៨ខែតុលាឆ្នាំ២០២៤នេះ មានការអញ្ជើញចូលរួមពីថ្នាក់ដឹកនាំក្រសួងប្រៃសណីយនិងទូរគមានគមន៍ តំណាងស្ថានទូតជប៉ុនប្រចាំកម្ពុជា តំណាងក្រសួងកិច្ចការផ្ទៃក្នុងនិងទំនាក់ទំនងនៃប្រទេសជប៉ុន គ្រឹះស្ថានសិក្សា និងវិស័យឯកជនសរុបប្រមាណ 250រូប។

ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានអញ្ជើញជាអធិបតីក្នុងពិធីបើកសិក្ខាសាលាស្តីពីបច្ចេកវិទ្យាឌីជីថលថ្មីៗ រួមមានOpen RAN និងសន្តិសុខតាមប្រព័ន្ធអ៊ីនធឺណិតនេះ។
សិក្ខាសាលានេះ រៀបចំឡើងក្នុងគោលបំណងចែករំលែក និងពង្រឹងការអភិវឌ្ឍធនធានមនុស្សផ្នែកបច្ចេកវិទ្យាទូរគមនាគមន៍ និងឌីជីថលនៅកម្ពុជា តាមរយៈការចាប់យកបច្ចេកវិទ្យាឌីជីថលថ្មី។ ប្រធានបទសំខាន់ៗ ធ្វើឡើងដោយអ្នកជំនាញមកពីក្រសួងទាំងពីរ និងតំណាងទីភ្នាក់ងារសហប្រតិបត្តិការអន្តរជាតិជប៉ុន (JICA)។

សិក្ខាសាលាបានផ្តោតទៅលើ ទិដ្ឋភាពការគំរាមកំហែងតាមប្រព័ន្ធសាយប័រ និងតួអង្គការពារសាយប័រ, សក្តានុពលនៃបច្ចេកវិទ្យា Open RAN, ក្នុងការអភិវឌ្ឍវិស័យទូរគមនាគមន៍នៅកម្ពុជា និងគំនិតផ្តួចផ្តើមនិងចូលរួមចំណែករបស់ JICA ក្នុងការអភិវឌ្ឍ និងសន្តិសុខតាមអ៊ីនធឺណិតនៅកម្ពុជា។

នៅក្នុងសិក្ខាសាលានេះ លោកស្រី MATSUBARA Mihoko ប្រធានអ្នកយុទ្ធសាស្ត្រផ្នែកសន្តិសុខសាយប៊័រ នៃសាជីវកម្មNTT ប្រទេសជប៉ុន បានចែករំលែកចំណេះដឹងអំពីការគំរាមកំហែង និងការការពារតាមប្រព័ន្ធសាយប៊័រ។

លោកស្រីបានលើកឡើងថា៖បទបង្ហាញរបស់គាត់ចង់បង្ហាញពីអ្វីដែលជាការគំរាមកំហែងនិងសារៈសំខាន់នៃការការពារសាយប៊័រ។ បើតាមក្រសួងប្រៃសណីយ៍ និងទូរគមនាគមន៍កម្ពុជាបានរាយការណ៍ថាការវាយប្រហារតាមអ៊ីនធឺណិតបានកើនឡើង ២៨% នៅក្នុងប្រទេសកម្ពុជាកាលពីឆ្នាំមុន ហើយឧក្រិដ្ឋកម្មតាមអ៊ីនធឺណិតដូចជា Phising និងការហ៊ែកគេហទំព័រ ព្រមទាំងចារកម្មតាមអ៊ីនធឺណិត បានគំរាមកំហែងដល់សេដ្ឋកិច្ចរបស់ប្រទេសនិងសន្តិសុខជាតិ។ ដោយសារប្រទេសកម្ពុជាពឹងផ្អែកកាន់តែខ្លាំងឡើងលើផ្នែកឌីជីថល រួមទាំងពាណិជ្ជកម្មអេឡិចត្រូនិក បច្ចេកវិទ្យាព័ត៌មាន វាបានក្លាយជាហេដ្ឋារចនាសម្ព័ន្ធស្នូលនៃសេដ្ឋកិច្ច និងសន្តិសុខជាតិ។

លោកបណ្ឌិត ABETA Sadayuki នាយកផ្នែកបច្ចេកវិទ្យានៃសាជីវកម្ម OREX SAI, INC. បានធ្វើបទបង្ហាញស្តីពីសក្តានុពលនៃបច្ចេកវិទ្យា Open RAN ។
លោកបណ្ឌិតបានមានប្រសាសន៍ថា៖ដូចមានចែងក្នុងបេសកកម្មរបស់ក្រសួងប្រៃសណីយ៍និងទូរគមនាគមន៍( MPTC) ការធ្វើឌីជីថលនីយកម្មមានសារៈសំខាន់ចំពោះការអភិវឌ្ឍន៍នាពេលអនាគតរបស់កម្ពុជាហើយវាមានសារៈសំខាន់ណាស់ក្នុងការកសាងបណ្តាញនិងហេដ្ឋារចនាសម្ព័ន្ធដ៏រឹងមាំ និងអាចទុកចិត្តបាន ។ Open RAN មានប្រសិទ្ធភាពខ្លាំងសម្រាប់ការកសាងសមត្ថភាពព្រោះវាជួយសម្រួលសមាហរណកម្មយ៉ាងរលូននៃឧបករណ៍ពីអ្នកលក់ផ្សេងៗ និងអនុញ្ញាតឱ្យមានការដំឡើងបណ្តាញដែលអាចបត់បែនបាន ដែលវាមិនភ្ជាប់តែជាមួយអ្នកផ្តល់សេវាតែមួយ។នេះជាកត្តាសំខាន់សម្រាប់ការលើកកម្ពស់ការអភិវឌ្ឍសេដ្ឋកិច្ច និងការលើកកម្ពស់គុណភាពជីវិតក្នុងប្រទេសកម្ពុជា ព្រោះវានឹងនាំទៅរកការអភិវឌ្ឍន៍ធនធានមនុស្សផ្នែកឌីជីថល និងកាត់បន្ថយជាអប្បបរមាគម្លាតខុសគ្នាក្នុងតំបន់។ លោកសង្ឃឹមថាសិក្ខាសាលានេះនឹងរួមចំណែកដល់បេសកកម្មរបស់ CADT ក្នុងការអភិវឌ្ឍធនធានមនុស្សផ្នែកឌីជីថល។

ចំណែកលោក KUMAGAI Takahiro អ្នកសម្របសម្រួលគម្រោងនៃទីភ្នាក់ងារកិច្ចសហប្រតិបត្តិការអន្តរជាតិជប៉ុន( JICA) បាននិយាយអំពីការផ្តួចផ្តើមគំនិតរបស់JICA លើវិស័យឌីជីថលសម្រាប់ការអភិវឌ្ឍនិងសន្តិសុខអ៊ីនធើណិតក្នុងប្រទេសកម្ពុជា។
លោកបានលើកឡើងថា៖ឌីជីថលភាវូបនីយកម្មនៃសេដ្ឋកិច្ចពិភពលោកកំពុងបង្កើនល្បឿនយ៉ាងឆាប់រហ័ស។ ការប្រើប្រាស់ទិន្នន័យ និងបច្ចេកវិទ្យាឌីជីថលកំពុងក្លាយជាផ្នែកសំខាន់នៃសកម្មភាពសេដ្ឋកិច្ចសង្គមហើយ “ឌីជីថលសម្រាប់ការអភិវឌ្ឍន៍” ឥឡូវនេះគឺជារបៀបវារៈដ៏សំខាន់មួយផ្តល់អំណាចដល់ប្រទេសមួយដើម្បីលើកកម្ពស់ឌីជីថលភាវូបនីយកម្ម ដើម្បីធ្វើឱ្យសេដ្ឋកិច្ចល្អប្រសើរឡើង លើកកំពស់សុខុមាលភាព និងបង្កើតបណ្តាញអ៊ីនធឺណិតប្រកបដោយសុវត្ថិភាព។

លោក KUMAGAI Takahiro បានណែនាំគំនិតផ្តួចផ្តើមរបស់ JICA ទាក់ទងនឹង”ឌីជីថលសម្រាប់ការអភិវឌ្ឍន៍”និង“សន្តិសុខតាមអ៊ីនធឺណិត” នៅកម្ពុជា ដើម្បីជំរុញកិច្ចសហប្រតិបត្តិការជប៉ុនឱ្យកាន់តែទូលំទូលាយជាមួយដៃគូនាពេលអនាគត។ JICA មានកិច្ចសហប្រតិបត្តិការជាច្រើនជាមួយកម្ពុជា និងអាស៊ានទាក់ទងនឹងការកសាងសមត្ថភាពសន្តិសុខតាមអ៊ីនធឺណិត និងវិស័យឌីជីថល។

រីឯវាគ្មិនមកពីកម្ពុជា អ្នកស្រី ជាតិ មរកត នាយិការងនៃនាយកដ្ឋានអ្នកស្រាវជ្រាវនិងសាស្ត្រាចារ្យនៃបណ្ឌិត្យសភាបច្ចេកវិទ្យាឌីជី ថលកម្ពុជា បានចែករំលែកប្រធានបទស្តីពីការអភិវឌ្ឍវិស័យទូរគមនាគមន៍ក្នុងប្រទេសកម្ពុជា។

អ្នកស្រីបានមានប្រសាសន៍ថា៖ទូរគមនាគមន៍ដើរតួនាទីយ៉ាងសំខាន់ក្នុងការអភិវឌ្ឍកម្ពុជាក៏ដូចជាពិភពលោក ជំរុញការតភ្ជាប់ឌីជីថលនិងកំណើនសេដ្ឋកិច្ច។រដ្ឋាភិបាល ស្ថាប័ននិយតកម្ម និងប្រតិបត្តិករ ក្នុងប្រទេសកម្ពុជា បាននិងកំពុងខិតខំប្រឹងប្រែងយ៉ាងខ្លាំងដើម្បីអភិវឌ្ឍហេដ្ឋារចនាសម្ព័ន្ធឌីជីថលនិងធនធានមនុស្សវិស័យនេះ។

គួរជម្រាបផងដែរថាសិក្ខាសាលាស្ដីពី Emerging Digital Technology powered by JAPAN—Current State of Open RAN and Cybersecurity មានការថ្លែងសុន្ទរកថាស្វាគមន៍ដោយលោក NOMURA Eigo អគ្គនាយកទទួលបន្ទុកកិច្ចការអន្តរជាតិនៃការិយាល័យយុទ្ធសាស្ត្រសាកលលោកនៃក្រសួងកិច្ចការផ្ទៃក្នុងនិងទំនាក់ទំនងនៃប្រទេសជប៉ុននិងថ្លែងសុន្ទរកថាបិទដោយលោក NAGASE Kensuke ភារៈធារីនៃស្ថានទូតជប៉ុនប្រចាំកម្ពុជា៕